طلعت زين مغني مصري موهوب صوته مميز جدا ، من مواليد اسكندرية أشتهر فترة التسعينات بتمصير الاغاني الأجنبية المصرية زي “ماكارينا و تيكي تا”، وللأسف لم يكن من النخبة ولا كان له أصدقاء و جمهور كبير متابع كل أعماله وألبوماته مثل الفنانين الموجودين في ذلك الوقت بداية من عمرو دياب و شلة حميد الشاعري (مصطفى/ايهاب/هشام) و محمد فؤاد و غيرهم .
والسبب الرئيسي في هذا ان طلعت كان دائما بيغرد خارج السرب و بيلعب في مناطق موسيقية ملهاش رواج وقتها في اذن أو مزاج المستمع المصري، وافتكر مقولة سمعتها من احد فنانين المسرح وهي “المقسوم هو افيونة المصريين” يعني عايز اي اغنية تنجح في مصر و تكسر الدنيا لازم تبقى ع المقسوم الموسيقي الشهير (دوم تك تك . دوم تك) اللي حميد طوره و خلاه ديجيتال و سيطر بيه على سوق الكاسيت في التسعينات.
طلعت قدم ألبومين بس في مسيرته هم ” تعالى ” سنة 1996 و البوم “تيكي تا” سنة 1997 ، يعني 16 اغنية قدم فيهم مزيكا شرقي و قدم بوب و روك و جاز و بلوز و غنى بالمصري و الانجليزي و عمل تشكيلة مزيكا متنوعة مختلفة جدا عن سوق الاغاني وقتها و الالبومين تجاريا نقدر نقول نجحو نجاح محدود بسبب ذكاء اختيار الاغاني الهيد لكن طلعت مستمرش لاسباب انا للامانة حاولت ابحث فيها بس يأست بسبب ندرة المعلومات و اتجه بعدها طلعت للتمثيل و ظهر في دور كبير فيلم “افريكانو” 2001
في البوم “تعالى” قدم طلعت الاغنية الهيد كلها بمزيكا مكس بين الجاز و السالسا مع لحن كاتشي جميل في الودن لاشرف محروس
والجديد بالذكر ان فيه حركة ترويج ذكية اتعملت بظهور طلعت زين في كليب “راجعين” لعمرو دياب” و هو بيغني اغنية “تعالى” في بداية الكليب قبل ما عمرو يدخل و ينزل بالهيت المشهورة “راجعين” في فيديو كليب وقتها ضم نجوم كتير زي عزت ابو عوف و حسين الامام و علاء ولي الدين ، عايز اقول بقى ان الكام ثانية دول هم اللي خلوني ادور على طلعت زين عشان الاغنية كانت حلوة في ودني لحد ما عرفت اسمه و لقيت ان فيه شريط كامل نازل بنفس الاسم و رحت اشتريت اشريط ده من محراب شرايط الكاسيت في المنصورة وقتها “صلاح و محمد”
في نفس الشريط ده طلعت زين قدم نفس المكس “جاز x سالسا” في اغنية خليك فاكر ، و عمل حاجة تانية مختلفة جدا ، قدم اغنية اسمها “العشق جنون” كانت عبارة عن مكس جاز في بلوز في روك برتم اسرع شوية يلائم عصر البوب ، اغنية ممتعة بشكل مش معقول يمكن دي اجمل اغنية قدمها في حياته ، و اداءه الصوتي رائع و صولو الجيتار اللي بيتلعب ممتع جدا يعني هتسمعها مش هتصدق ان دي اغنية مصرية في منتصف التسعينات و هي متوفرة على اليوتيوب بجودة اصلية و بعدد مشاهدات ضعيف جدا !
من أجمل الحاجات في طلعت زين هي اختياراته للاغاني ، شارك في أغنية ايقونية من اجمل اغاني التسعينات و هي اغنية “100 سنة سينما” و دي كانت في احتفالية سينمائية بمناسبة مرور 100 سنة على السينما في العالم ، و غنت معاه انغام و كانت على مزيكا عمر خيرت ، و دايما كنت بشوف طلعت مش واخد حقه لما الناس بتتكلم عن الاغنية دي دايما التركيز على انغام و عمر خيرت اكتر من الاداء الجميل و المميز لطلعت زين
طلعت زين كانت تجربة فريدة في زمن كان الاختلاف فيه مخاطرة كبيرة للمغني ، فيه تجارب انتحارية نجحت و استمرت زي منير ، لكن تجربة طلعت رغم انها متقدرش تقول انها فشلت لكن لم تستمر لاسباب غير مفهومة ، طلعت زين بيقول على نفسه مؤدي مش مغني لانه فاهم كويس انه مش صوت شرقي ، اسمعوه في اغنية “فاضل ايه” هتفهموه قصدي ، يحسب لطلعت انه اشتغل مع فنانين كبار وقتها من ملحنين و مؤلفين و صناع موسيقى ساعدو ان مشروعه الموسيقى يتقدم بأفضل صورة ممكنه ، و انا عامل البوست ده مخصوص عشان ادي الراجل ده بعضا من حقه يمكن الاقي ناس تانية بيحبوه زيي